Nge ninthowa imoza yakulimbikiska uchanda uwemi , wupu wakuona vya maji kuchigaba cha kumpoto, wa Northern Region Water Board pachiwiri, wachitiska ungano wachisanisani wa balongozgi wamupingo, na bakuchita malonda yama hardware, m’boma la Rumphi.
Ulato wa nkhumano iyi ikayima pakuwamanyiska bina Rumphi kuti kwambenge pulojekiti yakagawiro ka maji nakuchiska banthu kuti wazengenge vimbuzi viwemi kuti wavikililike kunthenda izo zikwiza chifukwa cha ukazuzi.
Pakuyowoya na Rumphi FM, Wakuwonerela vya uchanda uwemi na maji, ku wupu uwu ba Godfrey Shumba wati kuno ku Rumphi kwiza pulojekiti iyo yambikenge mu mwezi wa October chaka chino, ndipo ina ma component yawiri ayo nikupereka maji nakulimbikiska uchanda uwemi, kwizira ku pulojekiti iyi banthu wakuchiskika kuti wawe namaji yawemi na kuzenga vimbuzi viwemi.
Yumoza mwa walongozgi wa m’pingo,waku Rumphi Assemblies of God, ba Jostino Kamvaka wati uthenga wawupokerera ndipo wakufiska ku banthu nakuwachiska kuti wangawopanga chala.
Wapachitengo wakomiti yakuona vya vitukuko ya Bumba (ADC )ba Oliver Kumwenda, wati pa boma la Rumphi pakusowekera maji yauchanda uwemi, kweniso palije kotaya viskaska na kotaya vya muvimbuzi Pala vimbuzi vyazula, ndipo bawonga pulojekiti iyi chifukwa sono kuzengekenge vyose ivi.