Wupu wa kwendeska visola mu Charo chino wa MEC wachitiska vidumbilano na awo wakhumba kuzakaimilira pa vitengo vya wukhansala, mphala yamalango kweniso pa mulongozgi wa Charo chino na umo wakwenera kuchitila munyengo iyi yakutola mapepala ghakuwazomerezga kuima nawo pa visola vyapatatu ivyo viliko mu September pa 16 Chaka chino

Pakupereka uthenga wa upu wa MEC ku wimiliri awa bwanankubwa wa boma la Rumphi wa Emmanuel Bulukutu wadidimizga kuti waliyose wakwenera kulondezga malango gha Charo chino kweniso ndondomeko izo upu uwu wakhazikiska kweniso watolepo lwande pakukanizga viwawa na vivulupi.

Pakuyowoya na Rumphi community radio, Yumoza uyo wazamwima nawo pa chitengo Cha mphala ya malango muchigawa Cha kumafumilo gha dazi mu chipani Cha AFORD Florence Shapiru Khimbi Nyadimba wati Iwo mbakukondwa kuti wajipulikira ndondomeko na umo wakwenera kuchitila kuti wayime nawo pa chisola ichi ndipo mbakunozgeka kuchita ntheura.

Stainings Sagwa harawa awo wazamphalizgana nawo pa chitengo Cha wukhansala ku henga ward muchipani Cha MCP wati wose awo wayimenge wakwenera kulondezga nthowa izo zikulimbikiska umoza pakuchefya mphindano na kugawikana kweni wimilire pa fundo za chitukuko.

Charo chino kwizira ku wupu wa MEC chichitiskenge visola vyapatatu mu Charo chino pa 16 September Chaka chino apo mulimo wakutola mapepala ghakuwazomerezga kuima ulikwamba pa 10 June.