Bamama wokwana 21, kufuma ku chigaba cha Themba Chivwenene ku Mphompha m’boma la Rumphi mayiro wapoka masatifiketi yokuoneska kuti walikugawilika malo ndipo bana mazaza yakuwa na banangwa bose pamalo.
Ntchito zakuchiska kuti bamama nawo sono bawenge na banangwa wakuwa na malo ukuchitika na wupu ukulu ba We Effect mwakukolelanako na wupu wa SPRODETA.
Pakuyowoya na Rumphi FM, yumoza mwa walala ku wupu ba We Effect ba Esther Chirwa wati ntchakuzirwa chomene kuti bamama nawo wagawilikenge malo ya mdauko naulato wakuti wakhalenge umoyo wakujigomezga pakasakatiro ka chuma pakugwiliska ntchito malo ayo wapika.
Yumoza mwa bamama awo wapoka satifiketi, kufuma mumuzi wa Pyera ba Ethel Msowoya,wati mbakukondwa chomene chifukwa cha wupu ba We Effect kweniso SPRODETA chifukwa chakuchiska vikaya nakuwoneseska kuti bamama wakugawilika malo ya mdauko muvikaya, ndipo ivi vikuvwira kuti bamama wanandi awo wakawavya malo wasangenge malo nakujigomezga pa iwo wenkha.
Mlangizi mulala wakuona vya vitukuko kufuma ku Khosolo gha boma la Rumphi ba Robert Bob Chidonthi wati mulimo wakuchiska bamama kupikanga malo ya mdauko kwavwira kuchepeska mikangano ya minda muvikaya vinandi ndipo usange ntchito izi zalutilira bamama wanandi wajiyimilenge pawenkha.
Vyose vonkhwaskana na pulojekiti iyi vikuchitika na wupu wa We Effect, mwakukolelanako na wupu wa SPRODETA nawovwiri wa makopala kufuma ku sida.
